Abaim - Ki nou ete
Abaim enn lorganizasion non gouvernmantal ki finn kree an 1982. Li sorti depi enn fron soutien a bann travayer aveg Sant Lois Lagesse dan enn bel lagrev-okipasion ki zot ti fer an 1982. An 2020, lasosasion finn akredite par l'UNESCO dan kad Convention pou prezervasion patrimwann kiltirel intanzib.
Depi so nesans mem, lorganizasion la finn adopte enn lapros drwa dan manier pans e realiz so bann lobzektif. Li fonksionn lor filozolfi e bann prinsip demokratik ki ninport ki lalit pou amenn enn sosiete meyer bizin met divan divan.
Dousma-dousma, Abaim finn trouv li neseser pou okip osi bann zanfan vilnerab. Apartir 1995, lorganizasion inn met an-plas proze ‘Saturday care’ kot bann zanfan gagn lokazion pou exprim zot atraver koze, rakont zistwar, zwe, lamizik, e tou kalite kreativite.
Gras a so bann laktivite, Abaim finn vinn enn referans dan domenn leritaz kiltirel intanzib, prodiksion materyel pedagozik dan langaz kreol e kreasion mizikal, dan Moris. Li mem aktif dan bann landrwa kouma Omorn e Grand Bay
Mision
Kontribie atraver laksion sosial, ekonomik, psiko-pedagozik e kiltirel, pou lavansman dimounn vilnerab, sirtou zanfan e dimounn aveg avek enn gran partisipasion paran dan landrwa.
Vizion
Enn sosiete kot sak dimounn, depi so ti bout baba ziska so pli aze, gagn lokazion viv so lavi imin dan respe so dinite, san okenn diskriminasion.
UNESCO – Patrimwann imateryel
An 2020, Abaim finn vinn premie lorganizasion dan Repiblik Moris pou gagn akreditasion opre Konvansion lor Patrimwann Kiltirel Intanzib 2023 UNESCO. Sa finn posib gras a nivo e kalite travay ki Abaim finn fer depi li existe mem. Savedir ki li finn touletan met an-avan bann form lexpresion kiltirel ki dimounn ordiner servi pou zot exprim zot pou grandi ek devlope.
Nou finn fer boukou dan domenn kolektaz, sovgard e diseminasion bann eleman kiltir tradisionel dan domenn oralite atraver konba pou rekonesans nou lang maternel kreol, lamizik an zeneral me sirtou sega tipik, fabrikasion linstriman tradisionel kouma ravann, maravann e triyang, zwe lontan, sante, ladans e mont bann spektak.
Sa rekonesans UNESCO-la finn permet Abaim gagn pli gran vizibilite onivo lokal e internasional. Nou partisipasion dan bann forum internasional, latelie travay e festival bien apresie.
Depi 2023, nou reprezantan dan Forum NGO pe prezid enn group travay pou koriz inbalans ki ena dan reprezantasion bann rezion kouma Lafrik e Lamerik Latinn.